Xildhibaanad Ilhaan Cumar oo ka tirsan Congress-ka Mareykanka, kana tirsan xisbiga Dimuqraadiga, kuna matasha gobolka Minnesota, ayaa toddobaadkan sheegtay in Mareykanku uu hadda noqday mid ka mid ah “dalalka ugu xun” caalamka.
Ilhaan, oo asal ahaan kasoo jeeda Soomaaliya, waxay hadalkan ka sheegtay wareysi lagu daabacay bogga YouTube-ka ee barnaamijka Democracy Now! Jimcihii. Waxay tidhi:
“Waxaan ku soo koray nidaam kaligii taliye ah, laakiin xitaa marnaba maan arag wax la mid ah waxa hadda ka socda Mareykanka. Dalkii lagu tilmaami jiray iftiinka dimuqraadiyadda ee caalamka ayaa hadda u ekaaday mid ka mid ah dalalka ugu xun, iyadoo ciidamada millatarigu waddooyinka joogaan iyagoo aan wax tixgelin ah u haynin xuquuqda dastuuriga ah ee shacabka.”
Ilhaan waxay hadalkeeda kusoo beegtay ka hor intaan la qaban xaflad militari oo uu Madaxweynaha hore Donald Trump ku xusayay 250 sano guuradii kasoo wareegtay markii la aas-aasay ciidanka Mareykanka. Xafladdu waxay sidoo kale ku aaddanayd maalinta Calanka Mareykanka iyo sanadguuradii 79-aad ee Trump.
Ilhaan Cumar, oo aan la dhacsanayn xafladdaas, waxay sheegtay:
“Madaxweynahayagu wuxuu malaayiin dollar ku bixinayaa inuu is muujiyo sidii kaligii taliye fashilmay oo kale. Arrintani waa mid naxdin leh, waana inay shacabka Mareykanka aad uga digtoonaadaan. Tani ma aha dalkii aan ku dhalannay, ma aha dalkii aan ku faani jirnay, mana aha dalkii ay aasaaseyaasha ka fekereen. Dastuurkayagu iyo qiyamka aan aaminsannahay lama jaanqaadayo waxa socda.”
Waxay sidoo kale ku eedeysay Trump inuu burburinayo dalka, iyadoo tiri:
“Qofka dalka burburinaya waa inuu is eego, waana Trump. Ninkani wuxuu naceyb u hayaa qiyamka iyo dhismaha dalka Mareykanka. Dhab ahaantii bannaanbaxa iyo mucaaradka waa xuquuq dastuuri ah oo uu qof kasta leeyahay – waa xuquuqda koowaad ee dastuurka.”
Si kastaba, dad badan, gaar ahaan kuwa garabka midig ee Mareykanka, ayaa hadalka Ilhaan si adag u cambaareeyay. Guy Benson, oo ah qoraa ka tirsan Fox News, ayaa hadalka Ilhaan ku tilmaamay xadgudub weyn.
