Madaxweynaha dalka Kenya William Ruto ayaa shalay sheegay in Kenya ay guulo la taaban karo ka gaartay dagaalka ka dhanka ah argagixisada, inkastoo ay soo cusboonaadeen weeraro lala xiriirinayo Al-Shabaab oo ka dhacay qeybo ka mid ah Xeebta iyo Waqooyiga Kenya.
Madaxweyne William Ruto ayaa daliil cad u soo qaatay in garsoorka dalka Kenya ay maxkamad soo taageen ragii ka dambeeyay weeraradii lagu qaaday Jaamacadda Garissa iyo DusitD2 ayna Dowladdiisa u baahan tahay in lagala shaqeeyo dagaalka Kooxaha Argagexisada.
“Tusaale ahaan, intii uu socday weerarkii Dusit, maalgelinta waxaa laga helay bangi ku yaalla Koonfur Afrika, iyo sidoo kale bangiyada kala duwan ee Kenya iyo Soomaaliya,” ayuu yiri Ruto.
Isagoo ka hadlayay magaalada Mombasa shirweynaha 23-aad ee madaxda hay’adaha dacwad oogayaasha, ayaa Madaxweyne William Ruto uu ka digay in argagixsadu yihiin mid ka mid ah noocyada ugu khatarsan ee dambiyada abaabulan ee ka gudba xuduudaha waxaana ay khatar ku yihiin amniga qaranka.
Ugu dambeeyntii, waxa uu Madaxweyne William Ruto uu shaaca ka qaaday in Dowladiisa ay mar waliba diyaar u tahay inay sii wado dagaalka ay kula jirto kooxaha argagexisada sida Al-shabaab, waxaana uu laamaha amaanka Kenya ku ammaanay dhowr jeer ay ka hortageen weeraro uga yimid Kooxdaasi.
