Ururka Xoreynta Ogadenia (ONLF) ayaa si kulul uga falceliyey weerar hubeysan oo lagu qaaday xafiiskooda magaalada Jigjiga, iyaga oo sheegay in haddii aan wax laga qaban falalkaas lagu bartilmaameedsanayo xubnahooda, ay dib u qaadan doonaan dariiqii hubeynaa.
Afhayeenka ururka ONLF Cabdiqaadir Xasan Hirmooge oo Wareysi siiyay Idaacadda Risaala ayaa sheegay in weerarka uu ahaa mid si gaar ah loogu beegsaday madaxda sare ee ururka, taasoo muujinaysa, sida uu hadalka u dhigay, qorshe siyaasadeed oo lagu daciifinayo jiritaanka ururka.
“Dadka mas’uulka ka ah weerarka waa in si degdeg ah loo soo qabtaa, haddii kale ONLF waxay dib u eegaysaa mowqifkeeda siyaasadeed ee nabadda iyo wada hadalka ku dhisan,” ayuu yiri afhayeenka.
Ururka ONLF ayaa sanadihii u dambeeyey u wareegay hannaan siyaasadeed nabadeed kadib heshiis ay la galeen dowladda Itoobiya, balse waxay hadda muujinayaan walaac xoogan oo ku aaddan xasillooni darrada laga dareemayo deegaanka Soomaalida.
Dhacdadan ayaa imaanaysa xilli deegaanka Soomaalida uu wajahayo xaalado siyaasadeed oo qalafsan, waxaana loo arkaa hanjabaadda ONLF mid horseedi karta dib u milicsiga dagaalkii hore ee gobolka ka socday.
