Maamulka Puntland ayaa si rasmi ah uga horyimid qorshe ay sheegtay in lagu doonayo in gargaarka bani’aadantinimo lagu xiro isticmaalka kaarka aqoonsiga ee dowladda federaalka Soomaaliya. Sida ku cad war-saxaafadeed kasoo baxay Wasaaradda Gargaarka iyo Maareynta Musiibooyinka Puntland (MoHADM), arrintan waxay qeyb ka tahay wada-hadallo ay yeesheen Hay’adda Maareynta Musiibooyinka Soomaaliyeed (SoDMA) iyo Hay’adda Diiwaangelinta iyo Aqoonsiga Qaranka (NIRA).
Puntland waxay sheegtay in qorshahani uu yahay mid liddi ku ah mabaadi’da gargaarka bani’aadantinimo iyo madax-bannaanida dastuuriga ah ee dowlad goboleedyada. War-saxaafadeedka waxaa lagu xusay in isku day kasta oo lagu doonayo in dadka barakacayaasha ah lagu diiwaangeliyo qaab amaba nidaam dowladda federaalka ka imaanaya, uu yahay mid aan la aqbali Karin, waxaa ayna ka soo saartay qodobadan:-
- In aan gargaarka loo adeegsan siyaasad – Gargaarka waa in uu ahaadaa mid ku saleysan baahi, kana madax bannaan dano siyaasadeed.
- In la ilaaliyo awoodaha dastuuriga ah ee dowlad goboleedyada – Puntland waxay sheegtay in isku day kasta oo la isku dayo in lagu hoos geeyo awoodaha Federaalka uu yahay mid khilaafsan Dastuurka KMG ah.
- In deeq bixiyeyaasha iyo hay’adaha caalamiga ah ay door ka qaataan ilaalinta mabaadi’da gargaarka – Puntland waxay ugu baaqday beesha caalamka iyo hay’adaha gargaar bixiya in aysan ogolaan in gargaarka loo maro waddooyin siyaasadaysan.
Wasaaradda Gargaarka Puntland waxay si cad ugu baaqday hay’adaha gargaarka iyo beesha caalamka in ay ka fogaadaan tallaabo kasta oo wax u dhimi karta daahfurnaanta gargaarka. Waxay ku celisay inay diyaar u tahay wada shaqeyn furan iyo ilaalinta xuquuqda dadka nugul, iyadoo aan faragelin lagu sameyn nidaamyada ay Puntland mas’uulka ka tahay.
