Xildhibaanada Baarlamaanka Maamulka Koofur Galbeed ayaa maanta Gudoomiyaha Baarlamaanka u doortay Cali Saciid Fiqi, oo hadda ka mid ahaa xildhibaanada golaha shacabka ee Baarlamaanka Soomaaliya
81 mudane ayaa u codeeyay inuu Cali Saciid noqdo guddoomiyaha Baarlamaanka KGS, Cali Saciid ayaa horey u soo noqday guddoomiyaha golaha wakiilada ee maamulka Koofur Galbeed.
Qoraal ka soo baxay golaha wakiilada Maamulka Koofur galbeed ayaa lagu yiri.
Baydhabo, 27, February 2025;
Kusimaha Guddoomiyaha ahna Guddoomiye ku-xigeenka 1aad ee Golaha Wakiilada KGS Mudane, Maxamed Nuur Maxamed ayaa shir-guddoomiyay Kalfadhiga 8-aad Kulankiisa 7-aad oo Ajendihiisu ahaa Dhaarinta Xubin Xildhiban cusub iyo Buuxinta Kursiga Guddoomiyaha Golaha Wakiilada oo horey u banaanaa.
Guddoomiyaha Maxkamadda Sare ee KGS Axmed Cali Muse ayaa dhaariyay Xubin cusub oo kusoo biiray Baarlamaanka.
Intaas kadib ayaa la guda galay buuxinta Kursiga Guddoomiyaha Golaha Wakiilada KGS, Kusimaha Guddoomiyaha ahna Guddoomiye ku-xigeenka 1aad ee Golaha Wakiilada ayaa Cod gacan taag ah geliyay Buuxinta Kursiga Guddoomiyaha Golaha u sharaxnaa Dr Ali Said Faqi maadaama qof Musharax la tartamaayay uusan jirin, waxaa Oggol u codeeyay 81 xildhibaan wax diiday ama ka aamusay ma jirin.
Ugu dambeyn Guddoomiyaha Golaha ayaa u mahadceliyay Xildhibaanada isagoo soo xiray Kalfadhiga 8aad Kulankiisa 7aad ee Golaha Wakiilada.
