Xildhibaanada labada gole ee Baarlamaanka Fedaraalka Soomaaliya ayaa kulan wadajir ah oo ay maanta ku yeesheen xarunta Villa Hargeysa ee magaalada Muqdisho ku ansixiyay xeerka dhismaha Ururada iyo Xisbiyada Siyaasadda ee ka qeyb galaya doorashooyinka dalka.
Meel marinta xeerkaan ayaa waxaa cod aqlabiyad leh ku ansixiyay 177 Xidhibaan, waxaana ka aamusay hal Xildhibaan, mana jirin Xildhibaan diiday, sida uu sheegay guddoomiyaha Golaha Shacabka Sheekh Aadan Maxamed Nuur Madoobe.
Xeerkan cusub ayaa ah mid tilmaamaya shuruucda iyo xeerarka lagu hagi doono Ururada iyo Xisbiyada Siyaasadda ee dalka si loo hubiyo in Ururada iyo Xisbiyada siyaasada ay ku shaqeeyaan qaab hufan oo waafaqsan Dastuurka dalka.
Wasiirka Wasaaradda arrimaha gudaha Xukuumadda Fedaraalka Soomaaliya Cali Yuusuf Cali Xoosh oo kulanka labada gole goobjoog ka ahaa ayaa uga mahadceliyay labada gole talaabada ay ku meel mariyeen xeerka dhismaha Ururada iyo Xisbiyada Siyaasadda ee doorashooyinka.
Sabtigii lasoo dhaafay ayay aheyd markii sidaan oo kale Xildhibaanada labada Aqal ee Baarlamaanka Soomaaliya ay ku meel mariyeen xeerka dhismaha guddiga madaxa banaan ee doorashooyinka iyo sohdimaha, waxaana talabaasi ka horyimid maamulada Jubbaland, Puntland iyo siyaasiyiinta mucaaradka ah ee kasoo horjeeda dowladda Fedaraalka.
