Allah ha u naxariistee, waxaa xaley magaalada Hargeysa ku geeriyooday madaxweynihi hore ee Somaliland, Axmed Maxamed Maxamuud (Siilaanyo).
Axmed Siilaanyo oo ay da’diisu aheyd 86 sano jir, ayaa ku geeriyooday hoyga uu ka deganyahay magaalada Hargeysa, sidaasi waxaa xaqiijiyay madaxweynaha Somaliland Muse Biixi Cabdi. Muse, ayaa sidoo kale ka tacsiyeeyay geerida madaxweynihi hore.
Siilaanyo ayaa noqday madaxweynihi afraad ee Somaliland, inti udhaxeysay 2010-ki 2017-ki. Wuxuu kaloo soo hogaamiyay xisbiga hadda talada Somaliland haya ee Kulmiye.
Axmed Maxamed Maxamuud, wuxuu ku dhashay gobolka Togdheer qiyaasti sannadki 1938-ki. Wuxuu jagooyin kala duwan kasoo qabtay dowladihii rayidka iyo tii kacaanka ee Soomaaliya, isaga oo soo noqday wasiirka ganacsiga iyo wasiirka qorsheynta iyo jagooyin kale.
