Wasaaradda arrimaha dibadda Itoobiya ayaa xaqiijisay in ay ka go’an tahay dadaallada diblumaasiyadeed ee lagu xaqiijinayo marin la isku halayn karo oo dhanka badda ah, kaddib markii ay magaalada Ankara ku soo gebageboobeen wada hadalladii uu Turkigu garwadeen ka ahaa Soomaaliya, kaasi oo ku dhammaaday natiijo la’aan.
Wada-hadalladan oo la doonayay in lagu xalliyo xiisadaha u dhexeeya labada waddan ayaa u baahan doona wareeg saddexaad oo wadahadal ah, kaasoo hadda loo qorsheeyay September 17, 2024.
Isagoo ka hadlayay shir jaraa’id oo uu qabtay subaxnimadii Khamiista ee maanta, afhayeenka Wasaaradda, Danjire Nebiyu Tedla, ayuu carrabka ku adkeeyay dadaalka ay Itoobiya waddo ee lagu xaqiijinayo marin badeed la isku halleyn karo. Sidoo kale, wuxuu sheegay in Turkiga uu uga mahad-celinayo fududeynta wada-hadallada u dhexeeya Itoobiya iyo Soomaaliya, isagoo xusay in labada dal ay ku heshiiyeen inay sii wadaan wadahadalkooda wareegga saddexaad ee wadahadallada.
Danjire Tedla ayaa sidoo kale ka hadlay doorka Itoobiya ee amniga gobolka, gaar ahaan marka la eego howlgalka nabad ilaalinta ee Soomaaliya. Afhayeenku wuxuu carrabka ku adkeeyay muhiimadda ay leedahay in la tixgaliyo fikradaha dhammaan dalalka ay ciidamada ka joogaan Soomaaliya ee howlgalka Midowga Afrika (ATMIS) ee hab kasta oo nabad ilaalin mustaqbalka ah.
Tedla ayaa hoosta ka xariiqay baahida loo qabo in si taxadar leh loogala tashado hay’adaha ay khuseyso, oo ay ku jiraan Midowga Afrika (AU) iyo Qaramada Midoobay (UN), si loo xaqiijiyo kala-guurka fudud iyo in laga fogaado isfaham la’aanta ama xiisadaha gobolka.
Waxa uu sidoo kale tilmaamay muhiimadda ay leedahay in loo hoggaansamo go’aammada Golaha Ammaanka ee khuseeya geeddi-socodka.
