Wararku waxay sheegayaan in lagu ballamay kulan saddexaad in la isugu yimaado Ankara. Welise lama xaqiijin sababaha keenay in heshiis lagu gaari waayo wada xaajoodka uu turkigu gadaal ka riixayay.
Ilo wareedyo ayaa sheegaya in ay Ethiopia mar kale ku adkaysatay in aysan ka noqon doonin heshiiska is-afgaradka ah ee ay la gaartay maamulka goonigoosadka ah ee Somaliland, si ay usoo gasho biyaha Soomaaliya.
Wafuudda Soomaaliya ku malataysa shirkaan oo uu horkacayo wasiirka arrimaha dibadda Soomaaliya, Ambassador Axmed Macalin Fiqi, ayaa lagusoo waramayaa inay meel adag ka istaageen mowqifkooda ku aaddan in aanay diyaar u ahayn inay Ethiopia la galaan wada xaajood fool ka fool ah illaa inta Ethiopia ka noqonayso heshiiskii January 2024.
Wararka kale oo aan helayno waxay sheegayaan in Ethiopia qudheedu ay ku doodday inay marka hore wada fariistaan iyaga Soomaaliya, ayna wada gaaraan heshiis labadooda ka dhaxeeya oo xal u ah inay badda Soomaaliya u yeelato galaangal.
Waxaa la filayaa in ergada labada dal ay soo saaraan warmurtiyeed lagu sheegayo in shirku sii socondoono, yeelana doono waji saddexaad in la isugu yimaado.
