Wararka naga soo gaaraya degmada Cabudwaaq ee Waqooyiga Gobolka Galgaduud ayaa waxaa ay sheegayaan in halkaasi dil loogu geystay laba Qof oo Shacab ahaa.
Nin ku hubeysnaa Qorayga AK47 ayaa ku dilay Barxada Roob Da’ay ee degmada Cabudwaaq laba Ruux oo lagu kala Magacaabu jiray Cali Najax Cabdul iyo Faarax Faatax, iyada oo dilka kadib uu goobta ka baxsaday.
Ciidamo katirsan laamaha Amniga degmada Cabudwaaq ayaa tegay Goobta uu dilka ka dhacay, iyaga oo sameeyay howlgallo baaritaano ah wallow aysan gacanta ku dhigin Ninkii ka dambeeyay dilkaas.
Mas’uliyiita iyo laamaha Amniga degmada Cabudwaaq ee Waqooyiga Gobolka Galgaduud ayaan weli ka hadlin dilka ka dhacay degmadaas, hayeeshee dilalka aanooyinka qabiilka ah ayaa joogta uga dhaca degaannada Maamulka Galmudug.
