Sirdoonka Maraykanka ayaa ogaaday in Xuutiyiinta Yemen ay ka wada hadleen Al-Shabaab sidii ay hub ugu soo diri lahaayeen dalka Soomaaliya, oo mudo ka badan 30 sano colaado iyo xasilooni darro ay ka jireen.
Saddex sarkaal oo Maraykan ah ayaa u sheegay CNN heshiiska iyo wadatashaqeynta cusub ee Xuutiyiinta iyo Al-Shabaab ay tahay arin halis gelinaysa deganaanshaha gobolka Geeska Afrika oo markii horeba xasarado ay ka taagnaayeen.
Mareykanka ayaa uga digayay dalalka gobolka iskaashiga iyo hubta Xuutiyiinta usoo dirayaan Al-Shabaab, sida uu sheegay sarkaal sare oo ka tirsan maamulka Biden, waxaana sidoo kale dalalka Afrika ay bilaabeen in ay la xiriiraan dowladda Mareykanka si u helaan macluumaad dheeraad ah.
Sirdoonka Mareykanka waxuu sare u qaaday feejignaanta amniga Soomaaliya, Badda Cas iyo Gacanka Cadmeed, halkaas oo Xuutiyiintu ay weeraro joogto ah ku hayaan maraakiibta ganacsiga iyo Maraakiibta dagaalka ciidamada Maraykanka tan iyo markii uu bilawday dagaalka Gaza Oct. 2023.
Sanadihii lasoo dhaafay ayaa waxaa lagu qabtay xeebaha Puntland doomo siday hub fudud iyo agab militeri oo ka yimid dhanka dalka Yemen, iyadoo hadda Mareykanka uu shaaciyay inuu jiro heshiis dhex maray Al-Shabaab iyo Xuutiyiinta.
Dowladda Soomaaliya ayaa dhawaan la gashay Turkiga Heshiiska difaaca badda ah oo mudo 10 sano soconaya, kaasoo la filayo in wax looga qabto dhibaatooyinka ay kamid yihiin burcad-badeeda, kalluumeysiga sharci darada iyo qulqulka hubka ka yimaada dalka Yemen.
