Wasaaradda arrimaha dibadda ee dalka Itoobiya ayaa sheegtay in aysan jirin war rasmi ah oo ka soo baxay dowladda Soomaaliya, oo ku saabsan in Itoobiya lagu wargaliyay in ciidamadeeda nabad ilaalinta ah ay kala baxayso Soomaaliya.
Afhayeenka Wasaaradda arrimaha dibadda Ethiopia ayaa sheegay in aysan jirin xiriir diblumaasiyadeed oo rasmi ah oo ka soo baxay dhanka Soomaaliya oo ku aaddan arintaan.
Nabiu Tedla waxa uu sheegay in wada-hadallo la xidhiidha ciidanka bedeli doona Atmis aanay bilaabmin weli, isla markaana ay wali socoto wejigii koowaad.
Kumanaan askari oo Itoobiyaan ah ayaa ku sugan Soomaaliya iyagoo ku yimid heshiis labo geesood ah oo dhexmaray labada dal iyo midka howlgalka Midowga Afrika ee ku meel gaarka ah ee ATMIS..
Si kastaba ha ahaatee, dawladda Soomaaliya oo ka carootay heshiiskii Irid-badeedka ee dhexmaray dawladda Itoobiya iyo Somaliland, ayaa doonaysa in ay ciidamada Ethiopia dalka ka baxaan dhamaadka 2024-ka.
