Masuuliyiinta katirsan dowladda Soomaaliya ayaa maanta oo Khamiis ah kala qeyb galay kumannaan dadweyne ah oo ka kala yimid degmooyinka gobolka Banaadir, kuwaasi oo dhigay dibadbax ay kaga soo horjeedaan damaca Itoobiya ee badda Soomaaliya.
Qeybaha kala gedisan ee shacabka ayaa watay boorar ay ku muujinayeen in aan marnaba la aqbali karin xad-gudub lagu soo sameeyo dhulka Soomaaliya, isla markaana ugu baaqay Dowladda Itoobiya in ay ka fiirsato talaabooyinka qaldan oo ay qaadeyso.
“Baddeena iib ma ahan, Itoobiya waa inay joojisaa gardarada ay ku hayso dhulkeena iyo baddeena, Soomaaliya waxaa leh Soomaaliya” ayay ku qeylinayeen dibadbaxayaasha iyagoo watay boorar ay ku qoran yihiin ereyo Soomaali, English iyo Carabi.
Khudbado kala duwan oo ay masuuliyiintu jeediyeen waxay si isku mid ah uga horyimaadeen heshiiska Somaliland iyo Itoobiya, kaas oo ay ku tilmaameen mid xad gudub ku ah qaranimada Soomaaliya.
Masuuliyiintu waxay sheegeen, Soomaaliya inay diyaar u tahay inay dhulkeeda iyo baddeeda ka difaacato damaca gurracan ee Itoobiya.
