Wuxuu sidoo kale tilmaamay in Cali Jeyte uu mudnaa abaal marin iyo qadarin gaar ah oo uu ku muteystay sida uu dagaalka ka dhanka ah kooxda Al-shabaab uu ugu jiheeyay dadkiisa, islamarkaana xilka qaadista uu ku sameeyay Guudlaawe ay aheyd mid gardaro ah, waa sida uu hadalka u dhigay Digtoorka.
“Xilku waa meerto waana la iska qaadaa, laakiin Cali Jeyte waa halyey umada u soo baxay, wuxuu mudnaa in lagu abaal mariyo, horayna waan u sheegay cadaalad maaha in qof aad shaqo u dirsatay, isagoo ku sii maqan inaad xilka ka qaado, mida kale cabsi kama qabo in reer Hiiraan ay ku dagaalamayaan Baledweyne oo dadka reer Hiiraan ma diriraan” ayuu yiri Cabdinuur Sheekh Maxamed.
Dr. Cabdinuur ayaa sidoo kale xusay iney socdaan dadaalo lagu soo afjarayo khilaafka ka jira Hiiraan, islamarkaana uu madaxweyne Xasan Sheekh kala hadlay cabashada reer Hiiraan ay ka qabaan nidaamka maamulka Hirshabeelle.
“Wax kasta oo reer Hiiraan ay rabaan ayaan qabnaa in la sameeyo, Hirshabeelle dacwooyinka laga tirsanayo iyo qaabka ay u dhisan tahay waxaan kala hadlay madaxweynaha dalka, waxaana soo jeediyey in guddi gaar ah loo xilsaaro arrimahaas” ayuu yiri Dr. Cabdinuur Sheekh Maxamed.
Hadalka Dr. Cabdinuur ayaa kusoo beegmaya, iyadoo magaalaada Baledweyne ay wali ka jirto khilaafkii ka dhashay xilka qaadistii lagu sameeyay Cali Jeyte, taasoo sababtay in Cali Jeyte uu Baledweyne kaga dhawaaqo inuu yahay madaxweynaha maamul la baxay Hiiraan State.
