Ra’iisul Wasaaraha Xukuumadda Federaalka Soomaaliya, Xamse Cabdi Barre ayaa maanta magacaabay guddiga tira-koobka, soo celinta, qiimeynta iyo ka talo-bixinta nidaaminta hantida qaranka.
Guddigan oo ka kooban 8 xubnood oo isugu jira wasiirro, guddoomiyaha gobolka Banaadir iyo garyaqaanka guud ee Dowladda, ayaa loo igmaday soo celinta hantida qaranka Soomaaliyeed ee sida sharci darrada loo haysto.
Guddigan waxay kaloo qaban doonaan, tiro koobka hantida hay’adaha madaxa bannaan ee dowladda iyo dowladaha hoose, qiimaynta xaaladda ay ku sugan yihiin hantidaas iyo sida ugu habboon ee looga faaidaysanayo hantidaas.
Afhayeenka xukuumadda Soomaaliya, Farxaan Maxamed Jimcaale ayaa sheegay in hantida Dowladda ka maqan markii lasoo celiyo lagu fulindoono baahida loo qabo ee shaqada qaranka.
Gudiga la magacaabay ayaa waxaa ku jira Wasiirka Arimaha dibada Soomaaliya , Wasiirka Hawlha Guud Gudoomiyaha gobolka Banaadir ahna Duqa Magaalada Muqdsisho iyo xubno kale.
Magacaabista guddigaan ayaa ku soo beegmaysaa ka dib go’aanno maalmo ka hor ka soo baxay shirkii golaha wasiiradda ee khamiistii la soo dhaafay ay ku yeesheen Magaalada Muqdisho, kaasoo saldhiggiisu yahay, maaraynta maaliyadda, Maaraynta dakhliga, Iibka iyo Qandaraaska Qaranka, Maareynta Hantida Guud ee Qaranka iyo Maamulka iyo Maaraynta Shaqaalaha.
