Inta la xaqiijiyay 7 Ruux ayaa ku geeriyootay Saddex kalena waa ay ku dhaawacmeen halka ay ku barakaceen dad gaaraya ilaa 17,299 qof kadib fatahaad uu Wabiga Shabeelle ka geystay degaano katirsan dhulka dowlad degaanka Soomaalida.
Guddoomiyaha gobolka Shabeelle ee dowlad degaanka Soomaalida Aadan Axmed Sooyaan oo Warbaahinta la hadlay ayaa sheegay in fatahaadahani ay saameeyeen dad gaaraya ilaa 37,632 qof, kuwaas oo hadda xaalad nolo xumo ay ku heysato degaannadii ay u barakaceen.
Sidoo kale Guddoomiyaha gobolka Shabeelle ee dowlad degaanka Soomaalida wuxuu hadalkiisa u intaasi kudaray in dhul beereed dhan ilaa 67,226 Hektar ah ay baabi’iyeen fatahaadahan, dalaggan ayaa ahaa mid la gooyay iyo mid geedka saaran, dhammaantoodna waxaa xaaqay fatahaadan uu sameeyey Wabiga Shabeelle.
Wabiga Shabeelle oo mara qaybo kamid ah dowlad degaanka Soomaalida iyo Soomaaliya ayaa keenay fatahaado waaweyn oo ay ku barakaceen dad aad u badan, iyadoo fatahaadahani ay sidoo kale saameeyeen guryo badan iyo dhul beereedyo ay dadku tabcadeen.
