Warar dheeraad ah ayaa ka soo baxaya khasaaraha ka dhashay dab khasaare hantiyeed geystay oo saaka ka kacay Suuq Bacaad oo ku yaalla degmada Yaaqshiid ee gobolka Banaadir.
Dabka ayaa waxaa lagu soo warramayaa inuu ka dhashay gaari xamuul ah oo siday shidaal, kaas oo ku qarxay laanta Suuq Bacaad ee degmada Yaaqshiid.
Wararka ayaa sheegaya in dabkan uu baabi’iyay goobo ganacsi oo ku yaallay halkaasi, inkastoo mar dambe la damiyay.
Gurmadka ayaa waxaa ka qayb qaatay maamulka degmada iyo dadka deegaanka, waxaana mar dambe suuqa gaaray gaadiidka gurmadka degdega ah ee dab damiska.
Goobaha gubtay ayaa isugu jiray baqaaro ganacsi iyo sidoo kale makiinad shiidi jirtay xabad Soodada, sida ay sheegeen qaar ganacsatada oo la hadlay Idaacadda Shabelle.
Muddooyinkii la soo dhaafay ayaa waxaa caasimada ku soo badanayay falalka gubashada ah, waxaana ugu dambeeyay dabkii todobadkii hore ka kacay isbitaalka Martiini ee magaalada Muqdisho.
