Xubno katirsan Ururka Al-Shabaab ayaa saaka waxaa ay weerar ku qaadeen Saldhig Ciidamo katirsan kuwa dowlad Goboleedka Jubbaland ku leeyihiin degaanka lagu magacaabo Singaleyr oo kuyaalla duleedka Magaalada Kismaayo ee Xarunta KMG ah ee Maamulka Jubbaland.
Dagaal culus oo la isku adeegsaday hubka noocyadiisa kala duwan ayaa a dhacay degaanka Singaleyr, kaas oo geystay khasaaro isugu jira dhimasho iyo dhaawac, sida ay Risaala u sheegeen dadka degaanka.
Intii uu dagaalka socday ayaa waxaa Al-Shabaab ay sidoo kale weerar jidgal ah ku qaadeen Ciidamo gurmad ahaa oo katirsan kuwa Jubbaland kana yimid degaanka Baarka, waxana halkaasi ku dhex-maray dagaal xoogan oo siweyn looga maqlay degaanka Singaleyr.
Al-Shabaab oo sheegtay mas’uuliyadda weeraradaas ayaa waxaa ay sheegeen in ay dagaalka ku gubeen Gaari ay leeyihiin Ciidamada Jubbaland wallow aysan jirin cid madax banana oo xaqiijisay warkaas.
Wararkii ugu dambeeyay ee naga soo gaaraya duleedka Magaalada Kismaayo ayaa sheegaya in Ciidamada daraawiishta jubbaland ay howlgallo ka dhan ah Al-Shabaab ka wadaan inta u dhaxeeysa degaannada baarka iyo Singaleyr, halkaas oo uu ka dhacay dagaalka u dhaxeeya Ciidamada iyo Al-Shabaab.
